على مين الحق؟
-
المشهد - 2020/03/25
- 1459
المشهد بالشقلوب
مبارح المسا مر لعندي جاري أبو الريم ليشرب كاسة شاي، قلتلو: أخي أبو الريم مو عأساس حجر والدولة قالت بلا هالزيارات بين بعض والاختلاط مع بعض، يعني يا أخي أهلا وسهلا فيك يا أبو الريم، بتعرف أنو البيت بيتك ونحنا ضيوف عندك، بس إذا أنت من الدولة وعم تخالف الأوامر، فما منقدر نعتب عالشعب البسيط..
قلي أبو الريم: يا أبو بهيج نحنا منعرف مين معو كورونا ومين ما معو، ولو في شكوك حواليك ما كنت بجي لعندك، وكنا أصلا أخدناك عالحجر، لهيك ما في داعي تتفصحن وتطول لسانك.. قلتلو أمرك أبو الريم.
قلتلو: خير أبو الريم ما على بعضك شكلك مزعوج... قلي لك العالم وقفت شغلا، وأنا وأنت موظفين، بس في عالم ما معا مصاري وما فيها تاكل إذا ما اشتغلت، وهلق بيت أبو رنا من 4 أيام قاعد بالبيت سكرولو دكانتو وصار متدين مني هديك الحسبة، واليوم أختي أم فهد اتصلت فيي بدها مصاري لأن جوزها كمان قاعد بالبيت، وأنا راتبي يا دوب يكفيني لخمسة الشهر، وحلا إذا بتحلا..
قلتلو أخي أبو الريم إذا حكيت ما بتنزعج ولا بتطلع خلاقك عليي؟؟.. قلي لا ما تخاف.. قلتلو أكيد يا أبو الريم.. قلي لك عم قلك ما بعصب العما شو ما بتفهم.. قلتلو يا أبو الريم طيب الدولة قبل ما تسكر وتاخد هيك إجراءات ما كان لازم تفكر بالشعب كيف بدو يعمل ويعيش؟؟..
نفخ أبو الريم وقلي: بالله يا أبو بهيج تركني بحالي، لك يا زلمة والله الكورونا والموت بالكورونا أهون بألف مرة من العيشة اللي عايشينها، كهربا ما في، مي ما في، مواد غذائية أسعار متل النار، ما فيك تاكل متل الناس ولا تعيش متل الناس، وبيقولو خليك بالبيت وشوف كيف الصين وغير دول كافحت كورونا، على أساس نحنا أول شي منشبه البشر لحتى نعمل متل الصين..
قلتلو: طيب على مين الحق هون يا أبو الريم... قلي لك يا أخي الحكومة شو بدها تعمل؟؟ اذا التجار عم يغلو كلشي وعم يمصو دم الشعب؟؟ .. قلتلو فيها تعاقب ولو تاجر واحد أو محتكر واحد طول 10 سنين من الحرب، فيها تسجن مسؤول واحد فاسد طول هالفترة بس ما شفنا أي شي يسد تمنا وما يخلينا نحكي..
وهون فنجر أبو الريم عيونو: وقلي والله يبدو جلدك عم يحكك يا أبو بهيج...
