ضغط شعبي

المشهد بالشقلوب

قاعد أنا وأبو الريم جاري عم نتحدث، وفتحنا سيرة مجلس الشعب، قلتلو شو يا أبو الريم ما بدك ترشح حالك على مجلس الشعب .. قلي والله يا أبو بهيج متأكد إذا برشح حالي لأنجح، عدم المؤاخذة مين أحسن مني بمجلس الشعب أو مين أفهم مني؟

قلتلو والله يا أبو الريم ما حدا أحسن من حدا، بس يعني ممكن يوقفوا على موضوع انو ما معك شهادة جامعية عليا، لأني متل ما بعرف أنت متطوع على شهادة التاسع.

رمقني أبو الريم بنظرة تقدح شرراً، وقلي: ليش مين قلك انو كل اللي بمجلس الشعب معو شهادات؟ ويا سيدي حتى اللي معو شهادات مفكرو بيفهم، لا والله في كل واحد منن ما بيعرف الله وين حاطو، وإذا بتحب بعدلك ألف حادثة وقصة صارت بالمجلس بتدل على انو نص الأعضاء ما فهمانين شي بالدنيا.
قلتلو والله معك حق يا أبو الريم، بس بتعرف عم يقولو الوضع اتحسن، يعني صارت العالم هي عم تدفش المرشحين ليترشحو، يعني عم يعملو حملات على الفيس بوك ليخلو المرشحين يترشحوا للانتخابات، يعني متل ما تقول تحت ضغط وطلب الشعب صاير الترشح، وهادا الشي ممكن يخلي المرشحين اللي بدو ياهم الشعب يوصلو للمجلس.

نظرلي أبو الريم نظرة كلا اشمئزاز وقلي: من كل عقلك يا ابو بهيج إذا ما جاييهم ضو أخضر من فوق بيسترجو يرشحو حالن؟ يا سيدي حتى لو رشحو حالن انت برأيك رح ينجحوا حتى لو كان عندن مليون شخص عهادا الفيس بوك اللي متحكي عنو؟

وتابع أبو الريم بنفس النظر: بعدين قلي لشوف انت بتعرف حدا هون بالمنطقة ما بيحبني، بتعرف حدا ما بيطلع يستقبلني عأول الشارع أول ما يشوف سيارة الستيشن؟ قلتلو والله يا أبو الريم ما بعرف تحديدا إذا بحبوك أو بيخافوا من سيارة الستيشن..

وهون احمرت عيون أبو الريم وقلي: لا سيدي بيحبوني، ولو بيعطوني ضو أخضر من فوق لرشح حالي كنت فرجيتك أنو كل المنطقة بتحبني غضبا عنون كلون .. وهون قاطعت أبو الريم وقلتلو: أخي وصديقي أبو الريم دائما بسمعك بتقول كلمة من فوق، طيب من فوق ممكن تشرحلي شو يعني؟؟

وباللحظة هي انفجر أبو الريم وقلي: والله لولا العشرة والخبز والملح اللي بيننا لكنت خليت صواتك توصل لفوق، أبو بهيج أنت صاير عم تتطاول كتير على شغلات أبدا مانك قدا، يا ريت تلزم حدودك أحسن ما تجبرني أعمل شغلات تندم عليها كل حياتك ..

لما حسيت انو الوضع تأزم قلت أحسن شي لطف الجو، وقلتلو: روق أبو الريم عم نمزح معك .. جاوب أبو الريم وقلي: في شغلات ما بينمزح فيها أبداً، يعني بلالك هالوجع الراس أسترلك وأحسنلك.

قلتلو خلص أبو الريم روق هلق، وقلي مين بدك تنتخب؟ قلي: والله رح انتخب اللي بيجبلي كيلين سكر و5 ربطات خبز وإذا بيعطيني جرة غاز رح خلي كل عيلتي تصوتلو......