لشو التغيير؟

لشو التغيير؟

المشهد بالشقلوب

كنت قاعد أنا وجاري أبو الريم مبارح المسا، وعم قلو والله يا أبو الريم الوضع صعب كتير وما بقى قادر اتحمل أبداً، لازم نغير شي، لازم نعمل شي، أو رح أنفجر..

قلي أبو الريم: يا أبو بهيج بحياتك ما تغير شي، شفت إذا غيرت برغي بالسيارة، بعمرا ما بقى تمشي، رغم إنو البرغي حجمو صغير كتير بالنسبة للسيارة، لكن إذا غيرتو بتعطل السيارة.

قلتلو: يا جاري يا أبو الريم، يا أخي إذا السيارة ما عم توصلك على شغلك ولا عم تاخدك على على الضيعة، ولا عم تجيب فيها خضرتك من سوق الهال، ولا عم تقدر تأمن فيها خبزاتك، ولا عم تنقل فيها مازوتاتك أو جرة الغاز، لشو بدك ياها من أصلا؟

قلي: لاه يا أبو بهيج السيارة شي أساسي وضروري بالحياة، يعني أنت ما بتقدر تعيش بلا سيارة، يا أخي أول شي بتموت من البرد بالشارع، بعدين والله بيت أبو حيان بيضحكو عليك إنو ما عندك سيارة، تالت شي السيارة فيك متل ما تقول هي مكملة للبيت، يعني حلم أي مواطن هو إنو يكون عندو بيت وسيارة.

قلتلو: يا أبو الريم لك أنا معك، الله رزقنا بالبيت صحيح مهرهر شوي، بس كل ما جبنا سيارة بتطلع أسوأ من اللي قبلا، وكل ما بدنا نصلح البيت شوي بيكونو راحو المصاري عالسيارة، بتحسا عم تسرقن سرقا يا زلمة.

قلي: يا أبو بهيج يا أخي كل السيارات هيك، بدك مصروف كبير إجباري، ومستحيل تعيش بلاها.

قلتلو: يا جاري يا أبو الريم طيب ليك أبو عبدو ما شالله عندو سيارة معيشتو أحسن عيشة، من وراها عمل بيتو جنة، وما بيحط عليها ليرة براني، يا سيدي كل فترة بيغيرها ومن دون أي مشكلة، ولا في برغي بيوقع ولا شي منها بيفرط.

قلي: لو تتذكر يا أبو بهيج كيف كانت سيارة أبوه، لما كان عنا سيارات ضواياها تضوي كل بيوت الحارة التانية اللي ما كان فيها كهربا، يا سيدي كانت سيارتنا تحكي فيها كل الحارات التانية، بس هلق مشت أمورو وتعلم كيف يمشي السيارة متل الليرة.

قلتلو: يا جاري يا أبو طيب ونحنا شو ناقصنا، ليش ما منجيب السيارة منفليها تفلاية، ومنشوف كل برغي إذا شغال وبمحلو أو لا، ويا سيدي أي برغي مو شغال منشيلو ومنركب محلو، والسحارة على السقيفة معباية براغي.

قلي: يا أخي يا أبو بهيج مستحيل نحنا ما منفهم بالسيارات، لك يا سيدي حتى نحنا ما بيلبقلنا السيارات، كتير علينا طنبر وقدامو حمار، أصلا منيح اللي عنا سيارة، شوف في جيران ما عندن سيارات أبدا، وبيقضو الوقت ناطرين حدا يجبلن غراض معو.

قلتلو: يا جاري يا أبو الريم لك يا أخي ليش دائما بتطلع عالمثال السيء، شوف في عنا جيران بشوية هداوة ورواق سياراتن صارت متل الليرة، وعايشين أحسن عيشة معها، لازم نعمل متلن، وما نقول ليك نحنا أحسن من هدول اللي ما عندن سيارات.

قلي: لك أبو بهيج خلص طلعتلي خلاقي، ما بقى تحكي هيك عالسيارة، ما عاجبتك يا أخي روح سافر لبرا واركب سيارات أجنبية، بس زيوان البلد أحسن من حنطة جلب.

قلتلو: أبو الريم خلص رح غير السيرة، برأيك الحكومة شو رح تعمل اختراع جديد بعد البطاقة الذكية؟

 

 

شارك برأيك .. لتكتمل الصورة


استطلاعات الرأي

يجب ان تختار خيار قبل ارسال التصويت
هل تعتقد أن الوقت قد حان لبدء تطبيق الدفع الإلكتروني في سوريا؟
نعم، حان الوقت لبدء تطبيقه وفرضه فوراً وهو ضروري للاقتصاد
لا، يجب إعداد بنية تحتية تقنية ومن ثم البدء بفرضه
لا، غير جاهزين بالوضع الراهن نهائياً لتطبيق الدفع الإلكتروني
النتائج
نعم، حان الوقت لبدء تطبيقه وفرضه فوراً وهو ضروري للاقتصاد
لا، يجب إعداد بنية تحتية تقنية ومن ثم البدء بفرضه
لا، غير جاهزين بالوضع الراهن نهائياً لتطبيق الدفع الإلكتروني

الأكثر مشاهدة هذا الشهر